二零零九年四月一日

"財政預算案" 辯論發言

1.主旨

主席:

今次財政預算案，普遍民意認為，今次香港遇到咁大嘅經濟衝擊，政府係做得唔夠，呢個我係認同嘅，但係，我唔贊成特區政府亂派錢，因為亂派錢只可以短暫起到一啲作用，長遠嚟講未必對香港有幫助。所以，我認為，要討論財政預算案，根本上係要睇，政府有冇合理嘅資源投放政策，真係做到切中要害；我相信，從香港目前嘅環境嚟睇，呢個要害就係：點樣令到香港實現經濟轉型，令到我地嘅企業、我地嘅人才成功轉型，創造新的價值，鞏固香港嘅長遠競爭力，令到香港人、尤其係中產專業人士唔駛成日憂心忡忡，驚住隨時失業，相反，如果我地有一個好嘅預算案，令人覺得政府有承擔、識得做嘢，市民就可以盡快恢復信心，一齊努力，走出經濟谷底。

具體點樣做先至可以落實呢？就好似我以往一路係度推動，要政府加快投放資源於軟基建，令香港成為區域通信中心、數碼樞紐，並且推動創意產業，令到香港可以係數字珠江三角洲的發展中尋找到角色，實現優勢互補，將我地一路以嚟依賴歐美出口嘅模式轉變過來，走向內銷去取得平衡。只有咁樣做，先至有可能為中產專業人士同埋年輕人創造更多高增值嘅就業機遇。

2.經濟轉型：政府要加快投放資源於軟基建，令香港成為區域數碼樞紐

時至今日，社會已有共識，香港經濟需要轉型，問題係點樣先至做得到？香港未來嘅定位應該係點樣？以往我地一路專注要做國際金融中心和航運中心，呢啲係我地以往嘅強項，但係最近，國務院通過一項建議，要加快建設上海成為國際金融及航運中心，而我地鄰近嘅深圳，啱啱亦公佈要推出創業板，香港係呢啲方面，已經無可能再做獨市生意，我地無可避免將會面對國內其他城市越嚟越多嘅競爭，競爭並唔可怕，最緊要我地自己保持競爭力，但係我地要睇到，有競爭亦會有合作，香港要探討係區域中重新定位，點樣係區域嘅競爭中搵到合作空間。

講到區域定位和合作，我地睇下特區政府做得夠唔夠呢？特首係舊年嘅施政報告中提出搞「十大基建」，例如跨境鐵路、港珠澳大橋、兩地機場合作等，對於鞏固我地嘅物流網，係有用嘅，但政府只係著重硬基建，似乎忽略咗軟基建，睇唔到我地已經進入一個資訊世界、數碼世界，內地已提出要建立「數字珠江三角洲」，講到呢方面，香港做咗乜嘢呢？過往有乜嘢政策令到我地嘅資訊力量可以發揮作用呢？其實香港仲係好有優勢，我地有通訊自由、資訊自由，法制健全，只可惜，香港空有優勢，政府並無好好去利用，所以，我成日都促使政府推動數碼基建，就係希望政府唔好淨係做硬基建，應考慮投放資源做好軟基建，令到我地嘅傳統服務業加上資訊科技，轉型成為現代服務業，令到香港可以發展成為區域數碼基建、數據中心等，發揮數碼版權貿易等嘅角色，呢啲係我地經濟轉型嘅核心。

有乜嘢可以落實到呢？政府過往一直投放資源俾醫管局，開發臨床醫療管理系統，嚟緊仲會投放超過11億元，發展全港電子病歷，我深信，只要香港做好呢個醫療軟基建，唔單止可以提升我地嘅醫療服務，仲可以令香港醫療系處於區域領先地位，令到香港嘅醫療軟基建可以出口型內地。又例如食物和藥物安全成日出現問題，如果我地利用數碼軟基建，做好食物、藥物嘅安全追蹤，呢啲係絕對值得我地加快投資，既能夠係軟實力方面提高我地嘅競爭力，又可以係失業率高企嘅今日，紓緩IT界等專業人士嘅失業情況，係雙贏局面。

3.企業轉型：政府要推動創意產業，令到企業創造到更多新嘅價值

如果香港經濟要轉型，我地嘅企業亦要相應轉型，其中一個方向係企業靠創意增值。我於2月4日曾動議「推動本地創意產業發展」，陳茂波議員亦提出修正案，促請政府為創意產業提供稅務優惠，呢啲建議都獲得本會通過，顯示唔同黨派議員對此已有相當共識，但政府係呢方面似乎仲未覺得有需要改變，仲認為香港有低稅率已經好足夠。但係，當其他地方為咗鼓勵發展創意產業，紛紛提供更具吸引力嘅誘因時，我地嘅稅率相對優勢就唔再存在，好多跨國公司就會考慮去其他地方例如新加坡發展。

我係動議辯論中，亦建議政府成立一個創意產業基金，雖然政府總算有回應，係預算案提出預留3億元支援未來三年嘅發展。但我地不妨同新加坡比較一下，新加坡最近宣佈投放1.62億元推動媒體產業，但人地係講緊美金，如果特區政府再唔肯投放足夠資源，又點可能同鄰近城市比拚，吸引外面嘅公司嚟香港搞創意產業呢？

其實，有時就算唔駛用錢，政府亦可以幫到企業轉型和增值。個幾星期前，我舉辦咗一個有關新媒體發展嘅研討會，好多業界朋友反映，政府以往用公帑做咗唔少好嘢出嚟，例如香港電台有相當多嘅電視和廣播節目、地政署做咗電子地圖、運輸署又有電子交通資訊，業界好想利用呢啲嘢去開發更多嘅增值服務，但係就困難重重，原來，部分原因係在於庫務局嘅官僚制度，認為嗰啲嘢嘅版權係屬於政府，一係唔俾業界用，一係手續繁複，令到業界卻步。實際上，嗰啲嘢嘅版權係屬於全香港納稅人，如果能夠開放俾業界，鼓勵佢地做增值服務，令市民進一步受惠，政府亦唔駛多花一毫子，對於創意產業卻有好大嘅推動作用，何樂而不為？我實在諗唔到，政府有乜嘢理由唔肯開放呢啲公家版權呢？

仲有一樣嘢，政府唔駛用一分一毫，又能夠幫到好多香港企業，就係利用CEPA框架，同內地政府部門去商討，協助香港企業拓展內地市場，尤其係爭取廣東落實先試先行嘅項目，令到我地嘅企業搵到新市場， 加快企業轉型，自然就可以請多啲人。

4.人才轉型：政府要做好人才培訓，並協助中年人士掌握新技能

既然我地嘅企業要轉型，我地嘅人才當然亦要轉型來配合，財政預算案雖然講咗會撥款16億元用來保就業，卻主要係一啲涉及基本工種同埋好短期嘅措施，對於受金融風暴衝擊最大嘅中產專業人士，其實冇乜實質幫助。就算係年中會推出嘅「大學畢業生實習計劃」，包括安排畢業生到內地實習擴闊視野，我覺得係值得做，但仲有唔少問題未思考充足, 對於落實細節和業界嘅疑慮，政府仍然有需要交待。

隨著科技進步， 未來人才需要熟悉科技及互聯網，年輕人對於網上世界熟悉，我地唔需要擔心，就好似我個仔，而家只係得14歲，已經識得係互聯網上買賣嘢。我反而最擔心係中年就業人士點樣去適應網上科技，進入新經濟。以往我地中小企做開貿易的人士都要面對轉型，因為越來越多貿易係要通過好似eBay、Yahoo呢類網上平台進行， 一啲新的技巧例如電子營銷和採購，係需要人去掌握，政府幫助中年就業人士去掌握呢啲新技能，係咪責無旁貸呢?    

今日睇報紙, 政府考慮推出創業進修貸款, 幫助中產人士轉型, 係呢個經濟困難嘅時候，應盡快諮詢及落實，我仲希望政府可以增加資源嘅投放。

5.對財政預算案的整體評論

整體來講，我地每一位市民都對這次預算案能解決目前困境充滿期望。

美國總統奧巴馬上任前後，一直強調改變〈Change〉，因為佢好清楚知道，隨著金融海嘯嘅衝擊，人心思變：政府政策要變，經濟發展策略要變，人嘅思維和知識要變，美國作為超級大國都要改變，唔通香港政府官員仲以為我地可以獨善其身，用以往嘅方法去解決問題?特區政府必須因時制宜，香港先至可以成功做到經濟轉型，因為轉型要有定位、要有政策、要有決心、同埋要投放資源。如果政府唔做野, 我地嘅經濟轉型、企業轉型、人才轉型又點可以實施得到呢? 因此，我懇請政府增撥資源，係推動經濟轉型及解決就業方面做多啲實事。

主席，本人謹此陳辭。