二零零八年十月三十日

＜第二辯論環節＞
【跨媒體限制和版權條例】－－資訊科技及廣播事務（創意產業）

主席先生：

特首在施政報告第44段特別講到要推動創意產業發展，但其實政府講創意產業已經講咗5年，但創意產業一直都發展未見理想。我哋睇下鄰近地區韓國，佢係創意產業一個好成功例子係online game，由冇到有都係用咗8年時間，依家係世界數一數二，唔單只在韓國本土，仲能出口到全世界。但我哋講創意產業就一直冇乜成果，今次特首講要成立「創意產業辦公室」，我哋係絕對贊成同充滿期望，但我希望今次唔好只係停留係電影和音樂一個咁狹窄嘅傳統思維上。
時至今日，創意產業同互聯網嘅普及和新媒體嘅湧現息息相關。政府好應該係呢方面發揮「創意」，營造一個有利嘅環境，為呢啲產業帶來更多新機遇。但從現有政策嚟睇，特區政府似乎仲未意識到呢方面嘅問題。

主席，我覺得「創意產業辦公室」有三個重點要處理：
第1個重點： 檢討跨媒體擁有權限制：因為跨媒体擁有權條件名存實亡，現有些財團用灰色地帶去避過條例，所以依方面我哋必須要檢討。另一方面，新媒体嘅湧現可以配合傳統傳媒獲得更大嘅發展空間，產生協同效應。香港要發展知識型經濟和創意產業，更應鼓勵跨媒體經營，令依D媒體可以更自由、更開放，不斷發展壯大，最終衝出香港，取得區域競爭的優勢。當年制定跨媒體擁有權限制條文時，無可能想像到這些資訊革命，所以條例已經過時，外國政府亦已紛紛做檢討。我認為，特區政府的思維和條例有需要與時並進。
第2個重點： 要解決網上侵權執法嘅障礙，一講到創意產業，就涉及版權條例。現時版權條例政府一直在諮詢和修改，但我哋仍覺不足，很多國際唱片公司因為網上侵權和執法困難令佢哋退出香港市場，而新興嘅網上音樂平台，例如itunes，在歐美可以迅速發展，但他們偏偏不在香港建立平台，令香港創作人少了一個有效網上銷售平台。其實香港並唔係冇法例，但執法時遇到好多困難，特別係互聯網供應商未必充份合作，形成一個彊局。我哋睇到很多外國政府採取更主動角色去創造一個有利嘅環境，我期望當局係推動互聯網供應商、內容供應商和用戶三方面合作計劃會盡快見到成效，咁樣先有助創意產業發展。
第3個重點： 協助本港創意企業開拓內地市場，大家都認同發展創意產業需要一個更大市場，最近有一個年青人同我講，佢開咗一間小型網上遊戲公司，佢嘅產品要進入內地市場，但因為港資企業等同外資，所以審批時要經過重重關卡，一般要15個月才能完成，試問點樣同內地公司只需3個月嘅審批競爭呢？
另一個例子，就係我哋一直爭取的ICP互聯網內容供應商牌照，目前，港商在內地不能獨資擁有（ICP）牌照。我促請特區政府與內地協商，利用CEPA能夠爭取放寬香港業界申請ICP牌照的條件，讓港商獨資擁有ICP牌照，就算爭取在廣東省先試先行，亦是打開中國市場一個突破。
最後，我期望「創意產業辦公室」能探討出具體意見和成果，而點樣將依D意見和成果付諸實行，政府一定要有一個機制，將依D新思維帶入經濟機遇委員會，為香港創意產業尋求新出路。

主席，我謹此陳辭。