譚偉豪議員就「積極推動《珠三角洲地區改革發展規劃綱要》配套政策」
動議修正案發言

二零零九年三月四日

主席先生:

《珠三角洲地區改革發展規劃綱要》絕對係對香港融入區域發展嘅重要文件，整個區域轉型係事在必行，而香港日後可以扮演乜嘢角色，係問題所在。我上個月係本會動議“推動本地創意產業發展”，我諗我地都希望，香港可以發展成為珠三角創意產業嘅龍頭，但如果政府唔去爭取、唔去做嘢，都幾難實現。所以，黃定光議員提出嘅動議，我係完全贊同嘅。香港要往前走，一定要同珠三角地區形成一個大嘅經濟圈，但係香港點樣同其他城市分工合作，就變得好重要，因此，特區政府應該盡快確定香港嘅定位，令到我地係珠三角發展中搵到我地嘅角色，咁香港先至可以發展新經濟，創造更多高增值嘅就業機遇。