二零零九年四月二十九日

「因應經濟挑戰發展新經濟策略」議案發言

主席：

1.  政策局架構要與時俱進

香港要發展新經濟，特別係推動科技和創意產業，究竟欠缺咗啲乜嘢呢？我好同意葉劉淑儀議員今日提出嘅議案內容，認為香港需要一個專門推動創新科技和創意產業嘅政策局。

如果大家仲記得，香港係回歸之後，有過一個「資訊科技局」，後來改為「工商及科技局」，係2007年5月，又改名為「商務及經濟發展局」，在局方名稱中除去“科技”一詞，我同埋好多業界朋友都十分失望，當時，我同一班有心人，包括葉劉淑儀議員，組織咗100多名科技業界人士在立法會外集會請願，又同唔少議員和官員見面傾過，好可惜，都係扭轉唔到「科技」被除名嘅結局。雖然，當時特首口口聲聲話，局方改咗名，唔等於香港就冇科技，但係，名不正言不順，冇咗科技局，政府又點會認真推動科技？不過，經過全球金融海嘯，其他地方都要投放資源發展新經濟，連溫總見到特首，都話香港要發展新產業。所以，我請政府考慮改組架構，成立有關嘅政策局。

耍改組政策局，係咪好難呢？不妨睇下我地祖國，以前有「電子工業部」和「郵電部」，多年前改組為「信息產業部」，去年又改組為「工業和信息化部」，專門促進信息化，轉型至新經濟；而科學技術部就負責落實科技發展規劃；既然咁大嘅國家都可以與時俱進，一有需要就改組架構，香港點解做唔到？係咪因為政府故步自封？

2.  促進區域合作

香港經濟轉型要成功，關鍵係要做好區域合作和分工，將珠三角由世界工廠變成我地所期望嘅區域科技應用和創意產業中心。而係上個禮拜四，唐英年司長帶隊訪問廣州，我係好有期望，即使當日我係呢度捱到凌晨兩點，早上七點幾都趕去搭船，而今次訪問咗網易公司，市值達200多億元，年營業額約達到30億元，利潤可以去到16億元，就係靠網絡遊戲，可見創意產業大有可為；而深圳亦有大家熟知嘅騰訊公司，佢地係中國互聯網即時通訊系統嘅一哥，創辦人馬化騰30幾歲就成為中國首富之一。廣州和深圳都有呢啲新經濟高增長企業嘅典型，點解香港冇出現咁成功嘅例子呢？就係因為香港冇科技政策，市場又太細，我同業界好多朋友都擔心，再咁樣落去，香港就會被邊緣化。係今個星期一，我組織咗一個IT界考察團，同三十多名業界朋友再去廣州訪問，睇下點樣將香港嘅創意產業、特別係新媒體產業帶入廣東。其實，香港係電視、電影內容製作方面好有創意，好有優勢，香港嘅資訊自由、表達自由，亦係遠近馳名，問題係，政府有冇認真諗過，點樣幫助業界？落實CEPA，係廣東爭取落地播放權，互相融合，透過香港─深圳─廣州呢個重要連線，建立網絡，聯手發展科技和創意，建立新經濟，將會係我地未來嘅出路。

3.  改善科技融資

企業要壯大，尤其係科技企業，係要有好強力嘅金錢支援和融資渠道，呢個係遊戲規則。主席，美國納斯達克市場係1971年創立，30多年來已經孕育出一大批如微軟、英特爾、Google等高科技企業巨人。香港成日話搞融資係強項，但往往啲錢都係流咗去地產等傳統行業，至於科技融資，至今睇唔到有乜成績。本來，香港有創業板，講到明係為一啲具增長潛力嘅企業提供集資渠道，但搞咗咁多年，除咗俾小數財團搵到啲錢，可以話係一潭死水。睇下祖國，深圳好快就會推出創業板，你地話係好事抑或唔好事？好事就係以後科技融資可以更活躍，唔好事就係香港分分鐘俾深圳爬頭領先，連科技融資都好可能搞得差過人。

香港特區政府係時候要決定好自身要擔當嘅角色，醞釀更多天使投資，吸引更多風險基金，搞番好香港嘅創業板，令到更多本地企業走向新經濟。

主席，本人謹此陳辭。