二零零九年二月四日

譚偉豪議員就“推動本地創意產業發展”議案發言 

主席，我動議通過印載於議程內的議案。

主席先生，立法會過往一路要迫政府開職位，保就業、救中小企等等，我完全贊成。但係，只係治標不治本，唔能夠令香港長遠擺脫經濟困局。我認為，要令香港向新經濟轉型，創造新嘅競爭力，就必須靠「創新」和「創意」，因此，我今日提出呢個動議。 

【點解香港需要迫切發展創意產業？】

原因就係，好多人擔心，傳統產業逐漸萎縮，發展創意產業先可以為香港人，特別係年輕人，創造更多就業機會，尤其係特首多次講嘅高增值就業機會。

隨著珠江三角洲產業轉型，再加上金融海嘯嘅影響，當地有好多工廠倒閉，傳統職位流失得好多，製造業萎縮，又直接影響到香港經濟支柱之一嘅物流業，專業人士嘅職位亦往往受到波及。

至於金融業，以往每年都吸納一批大學畢業生，但係，係金融海嘯衝擊下，金融業已經成為裁員和收縮嘅重災區。

政府究竟有冇意識到，香港面臨嘅失業情況可以去到有幾差？政府亦唔好忘記，香港每年亦大約有18,000個全日制大學生和研究生投身就業市場，單靠本港四大經濟支柱「食老本」已經越來越行唔通。

【本地創意產業以往停滯不前，政府嘅政策和領導是否責無旁貸？】

中央政策組係2003年就發表過一份「香港創意產業基線研究」報告，將本地創意產業分為文化藝術、媒體、設計呢三大類共11個行業，分別係：1. 廣告，2. 建築，3. 藝術、古董與工藝品，4. 設計，5. 數碼娛樂，6. 電影與錄像，7. 音樂，8. 表演藝術，9. 出版與印刷，10. 軟件與電子計算，11. 電視與電台。我地不妨統稱為「創意十一行」。

報告出咗嚟，我地一等就等咗五年，特首先至係最近一份施政報告中講到，要成立創意產業辦公室，推動創意產業發展。政府以往淨係做研究報告，並無實質措施，得個「講」字，睇唔到有乜成果。就係因為政府推動不力，既缺乏有效的政策，又冇幫助業界打開國內市場，更缺乏整體統籌，令香港白白錯失了不少機會，以致香港缺乏創意產業嘅品牌和形象，導致「創意十一行」至今停滯不前，好似本地嘅電影和音樂行業，已逐漸失去優勢，政府實在係責無旁貸！

相反，英國倫敦雖然早已發展為國際金融中心，但由於政府有前瞻性，識得居安思危，從1997年開始，制定政策扶持創意產業，令創意產業每年有可觀嘅增長，到咗2006年已佔其GDP的8%，就業人數達200萬人，與金融服務業一起成為倫敦的兩大支柱。

在亞洲，韓國過去多年亦大力推動創意產業，在政府的支持下，韓劇和網上遊戲成功打入亞洲各地市場，讓韓國年青人獲得很多發展和就業的機會。

主席，我好想問下局長，政府究竟知唔知道，其他國家和地區發展創意產業所投入嘅資源和力度有幾大？係上個月，我同一啲業界朋友去咗上海，睇見上海近年積極推動傳統出版業向數碼出版業轉型，爭取到成立首個「國家級數字出版基地」，密謀發展成為國內數碼出版嘅龍頭。

而係今個月15號，一班業界朋友又叫我一齊去台灣，過往台灣投放好多資源，發展科技產業嘅成績有目共睹，而家佢地又積極發展數碼娛樂，所以，業界朋友好想了解一下，台灣有乜嘢政策去發展呢啲創意產業。

主席先生，業界朋友好心急去搵出路，而特區政府一路都冇去扮演一個積極參與嘅角色，令到業界好困惑、好失望。

【香港點樣先至可以發揮到我地嘅競爭優勢，打破目前的困局？】

香港是個自由開放的城市，絕對有創作自由嘅空間。香港人思想靈活，加上多元文化的背景，資訊及言論自由、知識產權都獲得保障。這些都是發展創意產業的有利條件，亦都係我地市民最珍惜和最需要維護嘅資產。

不過，本地創意產業以往遇到唔少困難：本土市場太細，搵唔到足夠嘅供應鏈，行業之間又分散發展，完全缺乏協同效應，融資又有困難，最慘就係，政府對呢個產業缺乏清晰定位和明確嘅政策。

香港作為一個中國的國際都會，可以發揮重要嘅橋樑角色，特別係，係珠三角區域規劃中尋求新定位。最近，國家公佈了《珠江三角洲地區改革發展規劃綱要(2008-2020年)》，包括提出了建立“數字珠江三角洲”，促進網路資源分享和互聯互通，其實，香港業界面對嘅最大發展障礙係，未能同內地互聯互通。本地音樂、出版、電視、數碼娛樂等業界朋友向我反映，佢地面對嘅主要困境係，本土市場太細，大家都希望，特區政府協助業界通過 CEPA，用先行先試方式，打開廣東省市場，將香港定位成為珠三角創意產業中心。

【特區政府究竟明唔明白，未來發展創意產業嘅核心動力係邊度呢？】
主席先生，要發展新嘅產業，一定要了解未來嘅趨勢，雖然創意產業並非新嘅行業，但業界一再向我表達佢地嘅憂慮，話政府真係完全唔明白，資訊科技對整個創意產業嘅發展係幾咁重要。我好想係呢度話俾政府知道，根據好多國家嘅發展策略，資訊科技，特別係數碼化和網絡化，係未來創意產業發展嘅核心動力。正因為資訊科技的進步，不斷咁拓展咗創意嘅空間。

舉個簡單例子，隨著寬頻上網、流動電話、Wifi等資訊科技普及之後，據國際唱片業協會（IFPI）預計，數碼音樂銷售額在2007年將佔整體音樂市場的15%，達到29億美元，而且仲係每年急速上升，因為，發展數碼化和網絡化嘅創意產業，既可以拓展彊界，衝破本土市場嘅限制，又能夠激發Web2.0時代人人平等參與創作，令到從生產商到用家嘅整個「產業鏈」係網絡化下連成一體。所以，傳統創意產業＋IT，絕非1+1=2咁簡單，而係潛力無限。

舉個例子，盛大集團是中國數一數二嘅網上遊戲公司，佢地嘅創辦人陳天橋曾經係中國首富，最近投資建設「起點中文網」，吸引到成千上萬嘅網上小說作家，收錄了20多萬本原創小說，目前註冊讀者超過2000萬，建立咗相當完善的創作、培養、銷售一體化的電子出版機制，一啲小說仲被改編成遊戲、電影、動漫，形成網絡原創文學嘅創意產業。

所以，資訊科技絕對可以令創意產業產生爆炸性嘅發展。

【政府採取有效行動，而家已經係刻不容緩！】
我提出呢個動議，就係要促使政府盡快用行動去落實。不過，一講到落實，就需要錢，雖然錢並非萬能，但無錢卻萬萬不能，其實，政府係咪投放足夠資源，好能夠反映出政府係呢件事上面，究竟係咪真心實意去推動。因此，我建議，政府設立一個為數30億港元嘅「創意產業基金」，用途包括鼓勵更多創業者創業，資助大學進行創意產業研究和培訓人才，吸引外國知名嘅創意企業來港發展，促進跨行業合作，特別係促進網絡新經濟和傳統創意產業嘅合作。

我希望呢個動議，能夠令到香港的「創意十一行」可以發展，為香港人、尤其係年輕人，創造更多高增值嘅就業機會，甚至發展成為本港嘅第五大支柱產業。

政府將會係4月1號成立創意產業辦公室，呢個我係支持嘅。但好多朋友都向我表達憂慮，擔心屆時嘅主管官員係咪有足夠嘅能力和權責去推動創意產業。所以，我建議政府，開設一個D6级職位去領導創意產業辦公室，以確保真係做到高層次嘅策劃和統籌，並做好政府跨部門嘅協調工作，更要能夠代表到香港，帶領業界一齊去同其他城市的相關官員協商和合作。

最後，香港與其要救要保，不如創新路，但要創新路，首先要有新思維，仲要敢於承擔，呢個就係我對政府嘅期望。

敬請各位同僚支持我嘅動議，令政府盡快落實各項建議。主席，我謹此陳辭。