二零零八年十一月二十六日

 “制訂低碳經濟的路線圖”議案辯論

主席，行政長官在施政報告中提出建立低碳經濟，推動以低耗能和低污染為基礎的經濟發展，我諗呢個政策係冇人唔認同嘅，而我特別關注嘅係，政府點先至可以落實有效嘅政策，我相信，政府一定要參考外國城市嘅先進例子，睇下外國有乜嘢最值得香港借鏡，然後提出具體的政策大綱、目標、策略及方案。

據我所知，外國係呢啲議題，做過好多研究，聯合國係2007年2月發表咗一份好全面嘅研究報告，針對控制氣候變化，促進可持續發展等問題，提出好多值得思考嘅建議。係一個world Changing .com網站，亦研究咗外國城市規劃的經驗。對於我地大家理解今日呢個動議辯論，尋求解決香港嘅相關問題，亦好有啟發性。

首先，係城市規劃方面，溫哥華好值得香港借鏡，溫哥華係過去20年，人口增加咗一半，但佢並冇向郊外大肆擴展，反而將人口集中起來，建立一個walkable可行走嘅社區，達到人多車少嘅效果。睇番我地香港嘅規劃，好似將軍澳區，由於係城市規劃做得差，逼使好多人即使去好近嘅地方，都要搭車，絕對係節能減排嘅反面教材。

其次，要改善能源效益，一定要係商住樓宇方面著手，有好多嘢可以做，例如，加強建築物條例中的節能條款，係照明、冷氣系統各方面進一步推行能源效益標籤制度，尤其要注重嘅係，要令到冷氣系統更有效絕緣，唔好俾冷氣無謂流失。我相信，香港引入呢啲先進科技，培訓更多本地專業人才，將來可以係本區域擔任更多嘅顧問工作。

最後，增加對節能減排政策措施的教育和宣傳，一方面係對企業的教育，提升佢地對碳排放的意識，另一方面係對市民教育，讓廣大市民明白，究竟我們可以做乜嘢才可以保護地球呢？最實際的方法，便是減少耗用資源。我們又怎樣衡量自己耗用資源的多與少呢？其實有一個網站各位同僚可以上網做測試www.myfootprint.org 。網站內有十多條問題，給大家回答；當中有些問題都是與大家的生活息息相關的。當答完所有問題後，你便會得到一個耗用地球資源的指標，顯示如果人人都好似你咁生活，要多少個地球才可以讓我地繼續生活。另外，網站內亦有一些提示，讓我地嘗試改變日常生活習慣，從而減少污染地球的行為。我相信如果每個人由現在開始減少消耗資源，地球便可以有喘息的機會。

主席，本人謹此陳辭。